Izohli lug‘at

va’z

ваъз

Ma’nolari

Diniy tushunchalarni xalqqa, qavmga tushuntirishga, targʻib qilishga qaratilgan nutq; voiz tomonidan yaxshilik va ezgulikka chaqiruvchi daʼvat.
Maʼruza; leksiya; nutq.
Nasihatomuz yoki tashviqiy nutq; pand-nasihat, oʻgit.
Vaʼz aytmoq (yoki oʻqimoq, qilmoq) Maʼruza qilmoq, nutq soʻzlamoq; tashviq-targʻib tarzidagi soʻzlar aytmoq.

Oradan uch kun oʻtib, namoz jumadan keyin, Abduvaqqos eshon vaʼz aytibdi, gʻazotga fatvo beribdi. — A. Qahhor — Qoʻshchinor chiroqlari.
Oʻz vaʼzini tamomlar ekan, dedi: "Tanqid keltirar foyda". — M. Ikrom — Koʻngil guli.
Xalil ota Toʻraxonovning balandparvoz vaʼzini jimgina oʻtirib tingladi. — Sh. Rashidov — Qudratli toʻlqin.
Majlisda oziq-ovqat "razvyorstka"si (taqsimlash) haqida vaʼz aytadi-yu, uyida sholini oʻraga koʻmadi. — H. Gʻulom — Mashʼal.
Nihoyat, doʻppaygan ikki goʻr ustida Olimjon aka koʻchani toʻldirgan xalqqa qarata vaʼz aytdi. — Sh. Xolmirzayev — Qil koʻprik.
U [qalandar] ovozini baland qoʻyib, oxirat kunidan vaʼz aytardi. — S. Siyoyev — Yorugʻlik.
Gʻiyosxon jigʻibiyroni chiqib, unga vaʼz oʻqishga tushib ketardi. — X. Sultonov — Onamning yurti.
Biz uni kolxoz radiouzelida mikrofon yonida vaʼz qilayotganida uchratdik. — H. Nazir — Oʻtlar tutashganda.

arab. – pand-nasihat; nasihat qilish

Manba: Vikilug‘at

Ko‘rilgan: 0