hunar

Ma’nolari

1. Muayyan koʻnikma, mahorat talab qiladigan, tirikchilikning asosiy manbai hisoblanuvchi ish, mashgʻulot; kasb.
2. Biror ishdagi mahorat, sanʼat; mohirlik, ustalik talab etuvchi ish, xatti-harakat.
3. Odat tusidagi ish, harakat.
4. Boʻlmagʻur, kelishmagan xatti-harakat, qiliq, odat.
5. Hunar koʻrsatmoq
6. biror ishga boʻlgan mahoratini namoyish qilmoq.
7. boʻlmagʻur, kelishmaydigan ish, harakat, qiliq namoyish qilmoq.
8. Hunar chiqarmoq. Boʻlmagʻur, yoqimsiz ish, harakat, qiliq qiladigan boʻlmoq; shunday ish, xatti-harakat, qiliqni odat qilmoq.
9. Hunar qilmoq
10. biror kasb-hunarni egallamoq.
11. biror boʻlmagʻur ish, xatti-harakat, qiliqni kasb qilmoq, odat qilmoq.

Misollar

• Hunar, hunardan rizqing unar. — Maqol.
• Yigit kishiga yetmish hunar oz. — Maqol.
• Onam ham oʻqituvchi, Bir hunari — toʻquvchi, Men-chi alo oʻquvchi... — Q. Muhammadiy
• Yigitning qoʻlida gulday hunari bor. — Oybek — Tanlangan asarlar
• Otasining hunarini yaxshi egallab olgan bu yigitcha uchun qishloqda ish koʻp edi. — S. Ahmad — Hukm.
• Boshqa bir hunarga bersak boʻlmaydimi? — dadamning sartaroshlikka hech koʻngillari yoʻq edi. — E. Raimov — Ajab qishloq.
• ..Hunarining borin unda bildirgan, Kungurasin poʻlatdan qip endirgan. — Murodxon.
• Konferansye "ikkinchi nomerda xohla-gan kishi xohlagan hunarini koʻrsatishi mumkin", deb hammani kuldirdi.. — A. Qahhor — Tanlangan asarlar.
• Chekinish uchun ham hu-nar kerak.. bu ham sanʼat talab qiladi. — Oybek — Quyosh qoraymas
• Ammo eski hunaringizni qilib, otamga chaqsangiz, mendan shafqat kutmang! — Mirmuhsin — Meʼmor.
• Uyda qovogʻini osiltirib, koʻchada begona ayolni koʻrganda iljayadigan, tirjayadigan hunarga oʻrgandi. — “Mushtum”.
• Kesatiq hunaring esingdan chiqdimi, deb turgan edim. Harnechuk yodingda ekan... — Qodiriy — Mehrobdan chayon.
• Abdishukur, ovozni bunchalik boshqacha qilishni kimdan oʻrganding? Hunaringga balli-ye... — Oybek — Tanlangan asarlar.
• Gʻaroyib kuchdan “sher” boʻlib ketgan bolalar tarbiyachilarini koʻrib xijolat tortish, izza boʻlish oʻrniga gʻilaylashgan koʻzlarini suzib, oʻz “hunar”larini davom ettiraverishdi. — Gazetadan.
• Lekin endigi koʻrgazmaga tomosha qilgani emas, hunarimni koʻrsatgani boraman. Gʻalati payvandlar qilganman. — A. Qahhor — Tanlangan asarlar
• Meʼyorini bilganlar shirin oʻtirib, hordiq chiqardi, xurmachasiga sigʻmaganlar hunar koʻrsatdi. Shirin oshga pashsha tushdi.. — Yunus Rajabiy — Toʻylar haqida oʻylar.
• Maktabda endi yigʻilish boʻlib qolsa, uni boʻlar-boʻlmas-ga maqtaydigan hunar chiqardi. — “Guldasta”.
• Bosh-koʻzimni aylantirib, qoʻlga oldingiz, endi hunar chiqaryapsizmi?S. — — Karomatov — Bir tomchi qon.
• Boʻlmagay inson aziz, yaxshi hunar qilmasa. Yoki oʻqib, ilm ila oʻzni guhar qilmasa. — Habibiy
• Sheʼr yozib, xon-u xonzodalar zardasini qaynatmoqni oʻziga hunar qilib olgan. — S. Siyoyev — Yorugʻlik.

Kelib chiqishi

sanʼat; bilim, koʻnikma, mahorat, ustalik; kasb.

Manba: Vikilug‘at