salom

Ma’nolari

1. Kishilarning oʻzaro uchrashgan paytlarida urf-odatga koʻra bir-biriga aytadigan soʻzi.
2. Amir, xon bilan ertalabki uchrashuv va undagi salom-alik marosimi.
3. etn. Kelinchakni toʻydan keyingi kun erta bilan olib chiqib, kuyovning ota-onalariga, qarindosh-urugʻlariga taʼzim qildirish marosimi va umuman kelinchaklar taʼzimi; kelinsalom.
4. Sahnada, oʻyin-tomosha maydonlarida aktyorlarning tomoshabinlarga taʼzimi.
5. (abdu)Salom (erkaklar ismi).
6. Duoyi salom q. duo.
7. Salom aytmoq Salom yoʻllamoq.
8. Salom alaykum Salom 1.
9. Salom yoʻllamoq biror shaxs yoki noma orqali salom aytib yubormoq.
10. Salom yoʻq, alik yoʻq Toʻsatdan, hech kutilmaganda, dabdurustdan.
11. Salomini yeb qoʻymoq Koʻpincha, salom bermagan bolalarga aytiladigan hazil ibora.
12. Soyasiga salom bermoq q. soya.
13. Salom ogʻasi Amir, xon saroyida rasmiy marosimlarga boshchilik qilib, uni nazorat qilib turgan lavozimli shaxs.

Misollar

• Alangali salom. Qizgʻin salom. Salom ham farz, alik ham farz. Bir kun tuz ichgan joyga qirq kun salom ber. — Maqol.
• Salom, professor!Xush kelibsiz, — dedi Hamza va Stepanovga qarab qulochini ochdi. — K. Yashin — Hamza.
• Gʻulomjon egilib salom berdi, sogʻ-salomatlik soʻradi. — M. Ismoiliy — Fargʻona tong otguncha.
• Ertalab xonning haramdan chiqish vaqti yaqinlashgan, salom va istiqbol uchun xoslardan sakkiz-toʻqqiz kishi yigʻilgan edilar. — A. Qodiriy — Mehrobdan chayon.
• Ertalab, odat boʻyicha, Nuri toʻr roʻmol yopinib, beshikdagi boladan to keksalarga qadar — hammaga salom qilar ekan. — Oybek — Tanlangan asarlar.
• [Rohila:] Jon qizim, eringni izzat qil! Qaynanangni izzat qil! Ertalab salomga chiqayotibsanmi? — A. Qahhor — Ogʻriq tishlar..
• Zulfizar raqsini tugatib, mahliyo boʻlib oʻtirgan tomoshabinga salom qilishi bilan, birdan hamma yoqni gulduratib qarsaklar koʻtarildi. — K. Yashin — Hamza.
• Havodan aylanib uchgan turnalar, borib bizning elga salom aytinglar, ey aziz turnalar, mening tilimdan doʻstu yoronlarga salom aytinglar. — "Tohir va Zuhra".
• Hammalari sogʻ-omon, — dedi Nizomiddinxoʻja. Sizga matbaa, gazetalardagi muharrir, musahhih doʻstlaringiz salom yoʻllashdi. — K. Yashin — Hamza.
• U kirgach, salom yoʻq, alik yoʻq, tomdan tarasha tushganday: Nimalar deb valdirayapsan, — deb oʻshqirdi. — "Mushtum".
• Erta turib kech keldi, Salomini yeb keldi. — "Boychechak".
• Supachalar ustida udaychi, shigʻovul, salom ogʻasi, tunqotar va darbon kabi tashrifot xodimlari oʻtirardilar. — S. Ayniy — Jallodlar.

Kelib chiqishi

[ arab. سَلَام – tinchlik, xavfsizlik; koʻrishish, salomlashish ]

Manba: Vikilug‘at