tanob

Ma’nolari

1. esk. Yer oʻlchash, uzunlik oʻlchash, chiziq tortish va shu kabilarda ishlatiladigan uzun chilvir, reja ip.
2. Tanob tortmoq (yoki urmoq) Reja ip tortib oʻlchamoq.
3. Umuman, ingichka arqon, chilvir yoki kanop ip, rishta.
4. esk. tar. Oʻrta Osiyo xonliklarida: tomonlari 60 gazdan iborat boʻlgan maydonga teng yuza (yer) oʻlchov birligi.
5. esk. tar. Oʻrta Osiyo, xususan Oʻzbekistonda qoʻllangan uzunlik oʻlchov birligi (17-asrda 39,9 metrga teng boʻlgan).
6. Ogʻzining (yoki labining) tanobi qochmoq ayn. ogʻzining bogʻichi qochmoq q. bogʻich.
7. Tanobini tortmoq 1) yoʻl, hajm va shu kabilar jihatdan qisqartmoq, kamaytirmoq.

Misollar

• Matchon toʻra kuzda hosilni yigʻishtirib olgach, qumgacha choʻzilgan boʻz yerlarga tanob urdirib, oʻziga qoʻshib oldi. — J. Sharipov — Xorazm.
• Shohning amri bilan ming polvon va kal ikki kecha-kunduz yoʻl tortib, Goʻsha togʻiga yetib, chortigʻlar [chodirlar] tanobini tortib, yotaverdi. — Zulfizar bilan Avazxon.
• Bekam-koʻst turmush kechirib, er-xotin totuv yashayotgan kezlarda toʻsatdan bu inoq oila charxining tanobi uzildi. — I. Rahim — Yosh xotin.
• Band etib zulfing aro koʻnglimni ozod etganing, Qush uchirgandek erur bogʻlab ayogʻiga tanob. — Nodira.
• Tong otguncha bir tanobcha yerning gʻoʻzasi suv ichdi. — I. Raxim — Chin muxabbat.
• Bogʻning sathini Salim uch yarim tanob, Fazliddin uch tanob moʻl-jalladi. — Oybek — Tanlangan asarlar.
• Murodovani koʻrganda ogʻzining tanobi qochadigan Zunnunov bugun haqiqatan ham xomush koʻrindi. — I. Rahim — Ixlos.
• -Bor, yana bir miridan tashladim, — deb yubordi. Inglizning labining tanobi qochib, iljaydi. — K. Yashin — Hamza.
• Mingan oti jonivor Yoʻlning tanobin tortdi. — Nurali.
• Umridan baraka topsin. Choʻlning tanobini tortyapti. — S. Ahmad — Qadrdon dalalar.
• Ovqatning tanobini tortib qoʻyishdi. — I. Rahim — Chin muxabbat

Kelib chiqishi

arabcha — arqon; pay

Manba: Vikilug‘at