tarz

Ma’nolari

1. (3-shaxs egalik shaklida — tarzi) Oʻzi bogʻlanib kelgan (oʻzidan oldin qoʻllangan) soʻz bildirgan narsaning yoʻsini, koʻrinishi, holati maʼnosini anglatadi.
2. (3-sh. egalik va oʻrin payt kelishigi shaklida — tarzida) Ish-harakat, narsa-hodisaning yoʻsini, ravishi maʼnosini bildiradi; yoʻsinida, sifatida.
3. (u.-p. k. shaklida — tarzda) Belgi bildiruvchi soʻzlar, shuningdek, ayrim olmoshlar bilan qoʻllanib, shu soʻzlar anglatgan belgili holatni, harakat-holatning shunday holat, yoʻsin bilan boʻlishini bildiradi; yoʻsinda, holda.
4. (3-sh.egalik. vaoʻ.-p. k. bilan — tarzida) koʻm. vazifasida. Oʻxshatish, qiyos munosabatini bildiradi; sifatida, kabi.
5. Yuz, chehra; qiyofa, ahvol.
6. Bir tarzi (yoki tarzda) ayn. bir holatda q. holat.

Misollar

• Hayot (turmush) tarzi.
• Onasining gaplari Sanamga hech yoqmagan, lekin gapning tarzidan onasining kampir bilan hamfikr ekanini anglagan edi. — Sh. Xolmirzayev — Toʻl-inlar.
• Suv muzga aylanganda, modda zarralarining harakat tarzi oʻzgaradi. — "Fan va turmush".
• Koʻngli tortib yurgan odami aytgani uchun xafa boʻlmadi, ammo hazilga hazil tarzida.. shoʻxlik qildi. — A. Qahhor — Qoʻshchinor chiroqlari.
• Davra suhbati savol-javob tarzida oʻtdi. — Gazetadan.
• Shu sababli oʻzingizga sir tarzida aytamanki, Angliya tez orada jahoniy davlat mavqeini yoʻqotadi. — A. Hakimov — Ilon izidan.
• Hafiz Mirzamuhamedovich odatiga xilof tarzda koʻproq gapirib qoʻyganini payqadi shekilli, birdan toʻxtab qoldi. — S. Karomatov — Oltin qum.
• Musavvirlar kitobning mazmuniga hamohang tarzda rasmlar chizishgan.. — "Fan va turmush".
• Shu tarzda ishlar juda sekin siljidi. — P. Qodirov — Uch ildiz.
• ..oʻlpon toʻlashdan bosh tortganlari uchun, oʻn olti ming Xilari.. jarima tarzida tortib olib kelindi. — P. Qodirov — Yulduzli tunlar.
• Tarzing bordir oyu kundan ziyoda. — "Oysuluv".
• Tarziga qarasang, bir lochin — shunqor. — "Bahrom va Gulandom".
• Univermagning sotuvchisi Barot Zohidov ishdan bir tarzi boʻlib kelgan kuni onasi koʻp nazr-niyoz bilan Barno domlanikiga yugurib qoladi. — "Mushtum".

Kelib chiqishi

[ arab. – harakat usuli, yoʻsin, ravish, uslub ]

Manba: Vikilug‘at