Izohli lug‘at
yonmoq
ёнмоқ
Ma’nolari
- Oʻt olmoq; oʻtda kuymoq.
- Yolqinlanib, nur berib turmoq.
- Nur, shuʼla sochmoq, porlamoq.
- Tovlanmoq, jilvalanmoq.
- Ortiq darajada issigʻi, harorati oshmoq, qizimoq.
- Ortiq darajada qizimoq.
- Butun vujudi bilan berilmoq, astoydil harakat qilmoq; qaygʻurmoq.
- Tutaqmoq, jahli chiqmoq; asabiylashib ketmoq.
- Kuchaymoq, avj olmoq; alangalanmoq.
- Sabrsizlik bilan kutmoq, oshiqmoq.
- Ichida chiroq yonganday boʻlmoq - bir oz xotirjam boʻlmoq, bir oz koʻngli tinchimoq.
Misollar
- Toʻqayga oʻt tushsa, hoʻlu quruq baravar yonadi. — Maqol
- Quruq oʻtin bir zumda lovullab yonib ketdi. — Mirzakalon Ismoiliy — Fargʻona tong otguncha
- Chayla qamishlari allaqachon yonib bitib, yogʻochlarigina qora koʻmir boʻlib, chars-churs qilib tutab yotardi. — N. Fozilov — Diydor
- Saroyning toʻrida boshqalarga qaraganda koʻrkamroq bir hujra.. bu hujrada sham yonadi. — Abdulla Qodiriy — Oʻtgan kunlar
- Haqiqatdan u kishining [Zokir O‘rinovichning] hovlisida chiroq yongan edi. — Shukur Xolmirzayev — Yoʻllar, yoʻldoshlar
- Koʻkda, daraxtlar ustida gʻuj-gʻuj yulduzlar yonadi. — Oybek — Tanlangan asarlar
- Archa turar oʻrtada yonib, Oqmoqdadir har yon shuʼla-nur. — Gʻayratiy
- Gilam choʻgʻdek yonadi.
- Koʻylak yengi tirsakka qadar shimarilgan, [qizning] tiqmachoqday bilaklarida ilon boshli oltin bilaguzuklar yonadi. — Oybek — Tanlangan asarlar
- -Uh, badanim yonib boradi.. - dedi Gulnor. — A. Muxtor — Opa-singillar
- U yonogʻini onasining yonib turgan oʻtli yonogʻiga surtib, siniq tovush bilan pichirladi. — Mirzakalon Ismoiliy — Fargʻona tong otguncha
- Quyosh tik kelgan. Havo lovullab yonadi. — Oybek — Tanlangan asarlar
- Kishini holdan toydiradigan saratonning havo yongan kunlarida har qanday tirik jon oʻzini panaga uradi. — "Sharq yulduzi"
- U [Rahim Saidov] pastga tushdi. Kun tikkaga kelgan, koʻcha yonardi. — Oʻlmas Umarbekov — Yoz yomgʻiri
- Yoʻlchi yozda yonib, chang-tuproq yalab, qishda qor-muz kechib, butun mahrumiyatlarga, butun ogʻirliklarga qaramasdan, jonkashlik bilan ishladi. — Oybek — Tanlangan asarlar
- Bu ashulani ham yonib, joʻshib aytdi. — Mirzakalon Ismoiliy — Fargʻona tong otguncha
- Onaman-u onaman, Bolam uchun yonaman. — "Qoʻshiqlar"
- Siz onamdan xafa boʻlmang, uning odatini bilasiz-ku, bir yonib, bir oʻchaveradi [dedi Rayhon]. — S. Anorboyev — Oqsoy
- Olimjon yotigʻi bilan soʻzlagan boʻlsa-da, rais yonib ketdi. — H. Nazir — Qanotlar
- Begʻubor tong kabi qalbingda Vatan ishqi, xalq mehri yonar. — Gʻayratiy
- Hozir Xalilovning nafrati yonib turibdi. — I. Rahim — Ixlos
- Navoiy Hirotga kirishi bilan uning maxsus farmon olib kelganligi butun shaharga yashindek tarqaldi. Hamma uni tezroq eshitish orzusi bilan yondi. — Oybek — Navoiy
- - Kampirning taʼrifini eshitib, ichimda chiroq yonganday boʻldi-yu, lekin bu gal odob saqlab indamadim, - dedi chol. — Parda Tursun — Oʻqituvchi
- Mingboshi ichida chiroq yonganday boʻldi, suyunchi koʻzlarida oʻt boʻlib yondi. — Mirzakalon Ismoiliy — Fargʻona tong otgunchaKoʻzi yonmoq - 1) asabiylashmoq, jahli chiqmoq.
- Qushbegining koʻzi yondi.. Manglay etlari tiriilib, soʻl qoʻli bilan soqolini tutamlab, fikrga ketdi. — Abdulla Qodiriy — Oʻtgan kunlar
- [Toʻgʻonbekning] Kichik, qiyiq koʻzlari yomon yonadi. — Oybek — Navoiy
- Badianing koʻzlari yonar, titrab turgan qoʻlidagi oʻtkir xanjar yarqirar edi. — Mirmuhsin — Meʼmor 2) juda xursand boʻlmoq.
- Quvonchdan Bektemirning koʻzlari yonib ketdi. — Oybek — Quyosh qoraymasLov etib yonmoq - qizishmoq, tutaqmoq, asabiylashmoq.
- Talʼatning nimaga shama qilayotganini tushundi-yu, lov etib yonib ketdi. — O‘tkir Hoshimov — Qalbingga quloq sol
- Munisxon lov etib yondi-da, chamadonini koʻtarib, qora yubkasida Qoʻqonga qarab joʻnadi. — O‘lmas Umarbekov — Yoz yomgʻiriYuragi yonmoq - 1) orzu qilmoq.
- -Bir koʻrsam, ikki ogʻiz gap aytsam, deb yuragim yonadigan boʻldi.. - dedi Davlatyor. — P. Tursun — Oʻqituvchi 2) ichi kuymoq, alanga olmoq.
- Nima qilay, Sherali akajon! Ayting! Yuragim oʻrtab yonyapti! — S. Karomatov — Oltin qum
- Bitta grafinni ushladi: -Sovugʻidanmi, issigʻidanmi? - Sovugʻidan quya qoling. Yurak yonib turibdi. — Sa’dulla Siyoyev — Otliq ayol
Manba: Vikilug‘at
Ko‘rilgan: 0