yugurmoq

Ma’nolari

1. Irgʻishlab, biror yoʻnalishda tez harakat qilmoq; chopmoq.
2. sprt. Yugurish bilan shugʻullanmoq; yugurishda qatnashmoq.
3. Biror ish yoki maqsadni amalga oshirish uchun harakat qilmoq; harakatida boʻlmoq, urinmoq.
4. Biror joy, tomonga oshigʻich, tez harakatda boʻlmoq, yoʻl olmoq.
5. Tezlik bilan harakatlanmoq (suv, shamol kabilarning harakati haqida).
6. Paydo boʻlmoq, namoyon boʻlmoq, koʻrinmoq (biror xususiyat, belgi, xolat va shu kabilar haqida).

Misollar

• Bor kuchi bilan yugurmoq. Bola yugurib, tepalikka chiqdi.
• Shu mahal bir toʻda bola chugʻurlashib, guzar tomonga yugurib ketdi. — Mirzakalon Ismoiliy — Fargʻona tong otguncha
• Gulnor bilan Unsin tanchada oʻtirib, bir-biriga mehribon egachi-singilday soʻzlasharkan, bolalardan biri yugurib keldi. — Oybek — Tanlangan asarlar
• Qayerdadir muzika yangrar, maydon chetidagi yoʻlkalarda maykachan qizlar yugurishardi. — O‘tkir Hoshimov — Qalbingga quloq sol
• Oʻqishning ketidan yugurmoq. Yugurganniki emas, buyurganniki. — Maqol
• Rais Umurzoq otaga oʻxshash obroʻli, tajribakor paxtakorlarni qoʻlga olish niyatida ozmuncha yugurmadi. — Sharof Rashidov — Boʻrondan kuchli
• Bugun Gavharning telegrammasini olish bilan vokzalga yugurdi. — Oʻtkir Hoshimov — Qalbingga quloq sol
• Bu Otabekni Toshkentdan uylantirib, boshini bogʻlamasak, kun sayin uning Margʻilon yugurishidan qutula olmasmiz. — Abdulla Qodiriy — Oʻtgan kunlar
• Qishloq oʻrtasidan oʻtadigan ikki soy toshlardan toshlarga urilib, koʻpirib, uzoq paxta dalalariga qarab yuguradi. — Mirmuhsin — Hamzaobodda
• Mirzachoʻlning och bagʻriga Yugurganda Sirdaryo Oʻylaganmi edi shunday Chamanlar yaratishni. — Turob Toʻla
• Uning yuziga qon yugurdi.
• [Ibn Sino] Nazari satrlar oralab yoʻrgʻalarkan, yer ostidan xazina topgan kishidek, qoʻllari asta titraydi, yuziga gʻalati tabassum yuguradi. — Mirkarim Osim — Kitobga ixlos
• Malohat Karimovaning yuzlariga qizil yugurdi, yuzidagi kuldirgichlar husniga husn qoʻshdi, koʻzlari charaqlab ketdi. — Oydin — Asl yor
• Endi har ikkovining ham yuziga jiddiyat yugurdi. — Husayn Shams — Dushman

Manba: Vikilug‘at