zavol

Ma’nolari

1. Kunning ikkinchi yarmi, kun oqqan payt bilan kun botar payt oraligʻi.
2. Yoʻq boʻlish, mahv boʻlish, oʻlim.
3. Ofat, kushanda.
4. Zavol boʻlmoq Biror kimsaning yoʻq (halok) boʻlishiga sabab boʻlmoq.
5. Zavol topmoq (yoki koʻrmoq) Yoʻq boʻlmoq, oʻlmoq; halokatga yuz tutmoq.

Misollar

• Shom boʻldi, zavol boʻldi, yigitga uvol boʻldi. — "Oq olma" — qizil olma.
• Rostga zavol yoʻq. — Maqol.
• Kamolingni koʻray, zavolingni koʻrmay. — T. Sulaymon — Intizor.
• Manmanlikka zavol yetar, Kam boʻlgan kamolga yetar. — "Zulfizar bilan Avazxon".
• Behunar, ilmsiz xalqni istiqbolda zavol kutajak. — S. Siyoyev — Avaz.
• Koʻk qurt! Yomon ofat. Gʻoʻzaning zavoli. Tezda tuxum-puxumini quritish kerak. — R. Azizxoʻjayev — Yashil chayla.
• Asabiy holat, hozir aytganimday, inson umrining zavolidir. — X. Toʻxtaboyev — Shirin qovunlar mamlakati.
• Suv tanqisligi hosilning zavolidir. — N. Safarov — Olovli izlar.
• Lekin Xosiyat opa va qizingizning baxtiga zavol boʻlishni istamadim. — M. Xayrullayev — Koʻngil.
• — Gulday umrimizga zavol boʻlgan kishi siz emasmisiz? — dedi Rohat Temirga. — B. Rahmonov — Yurak sirlari.
• U inson hamisha olgʻa intilishi, oʻrganishi, hayot sirlarini oʻzlashtirib olishi zarur. Aks holda, aql-zakovati yillar oʻtishi bilan oʻtmaslashadi, zavol topadi. — S. Karomatov — Bir tomchi qon.
• Qisqadir tuhmatning umri, bor maqol: Tuhmatchi, albatta, topajak zavol! — M. Xudoyqulov — Zilol suvli soy va kir magʻzava.

Kelib chiqishi

arab. – kunbotar payt; yoʻq boʻlish, halokat

Manba: Vikilug‘at